ماجد أخذها على سمن... لله درك ياماجد
اليوم كنت في أحد شوارع محافظة عنيزة
وفي الشارع إعلان من موبايلي عن إعتزال سامي الجابر
المهم قابلت أحد الشيبان طبعاً لاأعرفه في الشارع
وقال ليش حاطين صورة سامي الجابر
قلت إعلان عن إعتزال سامي الجابر
قال: هو إعتزل
قلت: نعم إعتزل
قال: كبر وإلا شبع
قلت: لا كبر وأخذ مافيه الكافية من النفخ الإعلامي.
قال : الله المستعان كان فيه لاعبين زمان وعتزلوا محيسن و الهريفي والثنيان..
قلت : ياعم تتابع كورة
قال : نعم
قلت : طيب أنت متابع تقول لكن ماشوفك ذكرت ماجد مع المعتزلين اللي ذكرت.
قال : اسمع يا بناخي ماجد عبدالله لحاله أخذها على سمن.
وشف بعد ماإعتزل الكورة عندنا انتهت.
ومستحيل إنه يتكرر
يقول : حضرت مرة حفل بالرياض
ويوم طلع ماجد كلنا تجمعنا عليه
وكل واحد بس يبغى لو يلمس ماجد بيده ويقبل يده
ماجد يابناخي مافيه بالكورة السعودية مثله.
قلت : سامي وياسر يقولون أفضل منه.
قال : سامي وياسر حقين حريم ( قالها مازحاً )
قلت ياعم : شكلك نصراوي.
قال: لا ما أشجع أي نادي إلا إذا لعبت أحد الفرق البرا معنا أشجع الفريق السعودي وتجدني عند التلفزيون متحمس للفريق السعودي لأن هذا يمثل السعودية أما لاصارت عندنا لا لأن فيه حساسية عندنا من بعض والكورة ماعاد هي مثل أول بعد إعتزال ماجد عبدالله.
منقول
