المدير ابو المفاتيح

السلام عليكم ورحمة الله وبركاته

الزملاء الافاضل ودي اسليكم بقصة وهي قصيرة جدا قالها لي واحد من الاصدقاء ايام المديريه العامة للبريد كان يعمل مراسل في احد مكاتب البريد التابعة للمنطقة الشرقية ودي ارمز له باسم أبو منصور

يقول أبو منصور كنت شغال في مكتب بريد او شعبة بريد ، و مدير ادارة مكتبها غليظ ما يعرف المزح ولا حتى الكلام جاد جدا و ما يتكلم كثير لكن النظرة عنده مثل حد السيف

اذا جاء الصباح للعمل ما ينزل من سيارته الا اذا دق بوري

واذا دق البوري اروح انا وابو فيصل السكرتير حقه نركض له

واذا وصلنا يمه نزل من السيارة ويادوب يطرح السلام ونمشي معاه لين يوصل مكتبه

وطول ما هو يمشي بالسيب ، يمسك بيده ميدالية مفاتيح يخرخش بها علشان الكل يعرف ان المدير وصل لحد يتحرك من مكتبه

علشان كذه سميناه بالادارة ابو المفاتيح

هذا الحال هو عودنا عليه يبي يتفشخر الرجال وبصراحة شخصيته مرعبه لانه ما يبتسم وكل اللي يبيه يطلبه بالاشاره

استمرينا على هذا الحال يجي 4 سنوات انا وابو فيصل

اذا بغاني دق الجرس ، واجي ادق الباب ياشر باصبعه يعني تعال

اجي ويناولني الورق وياشر بطرف اصبعه يعني روح

واذا سوى جولة على المكاتب يجي عند كل مكتب ويوقف عند الباب يناظر بالموظفين يعني ما ودي اسمع صوت

والموظفين كلهم عارفين شخصيته ويهابونه لأنه كان جبار ما يتساهل بالدوام أو التقصير

واحد من الموظفين يعلمني انه يتحمل الخصم ولا نظره من هذا المدير لان نظرته مرعبه

ويتابع ابو منصور يقول طيلة وجود هذا المدير في مكتبه انا لا استطيع اغادر باب مكتبه لانه لو دق الجرس وما دخلت مكتبه خلال 4 ثواني يعطيني نظرة طويلة بصراحة قلبي يطيح

ويتابع ابو منصور يقول انا عندي ولد يجي عمره 24 سنة

يقول ولدي منصور يدور وظيفة ودايم يطلب مني اكلم المدير يوظفه بالبريد لانه مضيع عمره مشاكل ومضاربات مع الشباب لان الله اعطاه جسم وعضلات وهو مداوم على كمال الاجسام

وفي احد الايام دخلت على المدير وقلت له يا طويل العمر ودي اكلمك بموضوع

ناظرني المدير نظرة جانبيه مضمونها وش عندك

قلت له ودي تتكرم علي بوظيفة لولدي

انا ما كملت كلامي اعطاني حركة بيده يعني فكني من سواليفك وخلك مكانك على الباب

وخرجت طبعا

وراحت الايام وجت الايام وفجأة حصل شي غريب

الساعة 3 العصر دق علي ولدي تلفون وقال يبه سويت حادث بالسيارة تعال الحق علي

واخذت منه العنوان ورحت يمه ولقيت المرور واقف والناس متجمعة ، ولقيت سيارة ولدي منعدمه من الامام والسيارة الثانية من الخلف يعني ولدي الغلطان 100%

قلت لا بد اشوف الرجال المصدوم واحاول اساوي معه الموضوع

قلت لولدي وين خصمك ؟ قال والله يا يبه خصمي رجال غريب

قلت له علامه ؟

قال وقف قدامي فجأة وانا كنت اظبط شماغي لاني رايح اقدم على وظيفة وما شفت السيارة وصدمته

وما مداني انزل الا جاني بوجهه الكشر وبدون ما يقول شي وده يضربني

قلت له صل على النبي اهدأ وهو مصر الا يضربني ووجهه عابس وما يهرج

قمت مسكته من رقبته وصفعته كف ودفيته عن سيارتي

تركني وراح يركض لسيارته يتصل بالتلفون وجلس يبكي

وانا تركته ورجعت وقفت عند سيارتي اطالع عليه مستغرب

قلت له : معقول ؟ هو فين الحين بسيارته ؟ قال لا جالس هناك عالرصيف عند العسكري

رحت له اشوفه وناظرني وعيونه حمر ويا هي مصيبة

طلع المدير

يوم شافني وده يخفي وجهه عني باي طريقه

لان عيونه حمر وباين عليه البكاء

قلت له من ؟ ابو فلان خير وش في وش صاير

قال الزفت هذاك تعدى علي وهو المخطيء

طبعا هو ما يدري انه ولدي

ناديت ولدي منصور وقلت له وش سويت للرجال ؟؟ قال لي علمته الادب

والمدير ساكت والخوف بعيونه

قلت له سود الله وجهك ومسكت الولد من اذنه قلت له اعتذر من عمك يا سويد الوجه هذا ابو فلان مدير مكتبنا

قال لي المدير : ليش هذا يقرب لك ؟

قلت العذر والسموحة طال عمرك هذا ولدي منصور

حب على راس عمك يا ثور

وجاء حب على راسه واعتذر له

والغريب ان المدير قبل الاعتذار وصار يسأل عن مؤهلات الولد وقال له : جب ملفك اشوف

المهم المرور انتهى من الكروكي وسلمنا الاوراق وكل السيارتين ما تشتغل تعطلن

طلبت من المدير انه يجي معي اوصله ، اشر لي بيده : ( لا ) ومشى بسرعة ناحية الرصيف يدور سيارة اجرة

وانا اخذت الولد ورحنا ندور سطحة

وفي اليوم التالي كنت في المطبخ حق البريد ، وباقي على وصول المدير 10 دقايق ، وشوي الا اسمع الجرس حق المكتب

رحت اركض دقيت الباب دخلت قال لي هلا ابو منصور تعال

(( ما قد قالها لي الا اليوم ))

دخلت وقلت امر طال عمرك بشر وش صار على السيارة قال مكانها ما سويت شي واستاجرت سيارة

(( شيء غريب جدا !! لان المدير يتكلم معي ولا مع أحد ))

قال لي معليش بالنسبة للولد ، انا كلمت مسئول بالرياض عن التوظيف وقال لي الحين ما في فرصة

بلغ الولد انه اذا حصل له نصيب ان شاء الله بيتوظف

وانا طبعا اعرف انه كذاب ما كلم ولا شي ، بس قلت له ابشر وبيض الله وجهك

سبحان الله ،، ما عرفت ان هذا الكف غير سلوك الرجال 360 درجة

ما عاد بعدها يخرخش بالمفاتيح ولا يدق بواري

وصار يتكلم مع الموظفين بدل الاشارة

سبحان من يغير ولا يتغير

وسلامتكم

قصة ولا اروع يا ابو حمد اضحكتني
اضحك الله سنك

مبدع يا بو حمد و سرد شييق و جميل

اشكر لكم اعجابكم وتشجيعكم في مواضيعي والقادم احلى ان شاء الله