خاص للعزاب ....ممنوع دخول البنات
سؤال لكل عزوبي .. يتسدح بالملحق ؟
هل تنام على بطنك ؟ او تخم الوسادة بالليل ؟ او تعفس الكنب وتعضه وتسعبل عليه وانت نايم
او تنام في الشوارع كأنك قطو .. او تنام على الكنب وانت تقرأ الجريده
او تنام ويطلع سرك <<<<< ستر الله سرك.
إذا كانت الاجابة بنعم فإن كل هذه اعراض لرغبة جامحه وكامنه بالزواج
وان ما تلاحقت عمرك راح يجي اليوم اللي يقول فيه الوالد لك :
" الله لا يبارك في الساعة اللي جبنا فيها شغاله ".
لا تتخذ قرار الزواج إلا وانت في حالة هدوء تااااام بعيداً عن الاثارة والعواطف الجياشه
مو تشوف فيديو كليب بعدها تطمر لأمك وانت مشبك اصابعك ومميل رقبتك وتقول
( دوروا لي ابي اعرس ) ، ابي اكمل نصف ديني .
V
V
V
اولاً : مرحلة ما قبل الزواج :
كيف تعرف انك استويت عزيزي الشاب وحان قطافك من بنت الحلال :
علامات الرغبة في الزواج عند الشاب :
- إذا بديت تحب الاغاني وتسمعها بمخمخه وتتخيل انك تقول الكلام لوحده فاعرف انك
(منتهي ) فتلاحق عمرك وشف لك بنت حلال ، بشرط توافر الشروط الاخرى فيك
( وظيفه مناسبة ، ومبالغ مالية لمواجهة مصاريف العرس ) << التقسيط متاح بدون كفيل .
كذلك إذا صرت تتابع الفيديو كليب وتفتح فمك ولو يناديك ابوك ما ترد عليه.
2– إذا بديت تقول يا زين المغرب والـ إل بي سي والمستقبل ؟
فاعلم اخي العكس انك لو انتظرت سنتين ستصدّي صواميل ظهرك وتصير بلا مستقبل.
3– إذا بديت تمشى بالسوق وتتمنى ان البنت اللي قدامك تطيح اللي هي شايلته
علشان تصدم فيها وتقول (اسف ) وتشيل اغراضها مسوي فيها حسين فهمي
فاعرف انك على مشارف انك تكون (مسبهه ) وشهار ما يقبلك ولا منتسب .
4– إذا بديت تعطّر بعطور نسائيه وتقول ما فيها شيء (العطورات ليست حكرا على احد ) ..
فاعرف انك بديت (تخق ) لذلك اكرب عمرك واعرس.
اثناء الخطبة :
1 – انضبط وابدأ صل بالمسجد . واجعل المحافظة على الصلاة تحول دائم
من الخطبة إلى آخر عمرك.
لان اهل البنت يبي يسألون شيبان المسجد ويقولون تعرفون فلان ..
لذلك صل وابد (طلطل ) بوجيه المصلين كأنك تدور اخوانك<<<<<< ما احب هالحركه.
2– لا تتهيبل وتروح تتسلف سيارة زميلك (الفخمه ) وترزها عند باب اللي انت خاطب منهم
لأن الخطيبة مصيرها تعرف ان السياره مو سيارتك وبالتالي تطيح من عينها .. بكيفها ..
3 - اثناء الشوفه لا تستحي ابدا وقز البنت من راسها لرجليها ولا يهمك ابوها واخوانها
لأن الشرع (يدعمك ) .
وكما قال الشاعر (
(لسان الفتى نصف ونصف فؤاده **** فلم يبق الا صورة اللحم والدمِ )
لايروح بالكم بعيد هههههه.
4- في الخطبة ان صار فيه مكالمات بعد ما يوافقون عليك .. فلا تصير لزقه وعلة وكل دقيقة
داق على البنت ..
( وينكم فيه ) ؟ وش سويتوا اليوم ؟ ما اشتقتي لي؟
وش تسوين ؟ انت على السرير وإلا في المقلط ؟ << يخرب بيت هالسؤال ؟
5 - لو(كتبت كتابك ) على البنت قبل بفترة وبديت تأثث بيتك .. لا تاخذ البنت إلا علشان تختار
غرفة نومها بسسس
وإلا باقي الاثاث اختاره انت وإلا خلها هي اللي تختاره كله ..لانكم إذا بديتوا تطلعون مع بعض تختارون الاثاث ..
فراح يطلع الاثاث مشكل تشكيلة عجيبه والوانه كأنها (شراب تكرونيه بكورنيش جده)..هههههههه
كذلك اضبط ميزانيتك على مستوى معين من الأثاث بمعنى .. ما تشتري لوحه بــ 3000 الاف والكنبات بـ 5000 الاف ..
يعني ما فيه توازن وتروح تشتري لوحه ثانية من (سبلاش) بــ 20 ريال ، ومن ايكيا بــ 150 ريال ..
فيصير بيتك كأنه (حراج ابن قاسم ) من كل بحر قطره. فتصير مثل اللي بيتهم طين وعندهم (رولز ).
6 – اياني وياك تظهر بشكل مثالي في الخطبة بل خلك على طبيعتك ، بحيث تقول للبنت هذا اناااا ..
مو تصير حبيّب بالخطبة مهبول بعد الملكة.
ليلة الزواج :
1- ليلة العمر والليلة الوحيده اللي تحس فيها انك اهم واحد بالاحتفال ..
فلا تصدق عمرك ويكبر راسك ..
خلك طبيعي ولا تكثر من شرب الشاي والقهوة ليلة العرس بعدين تنتفخ مثانتك ، فتتورط ،
لانه صعب إذا رحت جلست مع العروس على ( الكوشه ) .. فجأه تقوم تقول بعد اذنك باروح الحمام ..
صدقني راح تقول البنت إللي هذا اوله ينعاف تاليه .. فلنفرض انك قمت من الكوشه ؟؟
بعد ما تخلص هل بترجع وتجلس مع العروس مره ثانية ؟؟
وإلا بتطلع من هناك ؟ بالعربي .. انت بتبلش بلشة ما بعدها بلشة أما إذا رجعت بيقولون الحريم
(جاه ؟؟؟؟؟ من الخوف من المدام )
اجل إذا راحوا الشقة بلحالهم وش بيسوي هالخواف.؟ فتصير علك في فم الرايح والجاي
وملطشه للصغير والكبير.
2 – ليلة العرس ارفق على سيارة الرجال اللي انت متسلفها منه ..
لانك ممكن تصدم لانك ما تعودت انك تكون بسياره كشخه مرتاع وجنبك بنت <<<< وش دراك؟
3 - خلك ذوق وحط يدك فوق يد البنيه ولا تكثر تفغيص يدها لانك بتتهور وممكن يصير لك شيء
وإلا يجيك (شد عضلي ) بعدين تصدم باشاره <<<< لاحقين خير ان شاء الله ...
4 - إذا جيتوا تدخلون البيت .. افتح الباب وخلها تدخل قبلك وامزح معها شوي (خشي برجلك اليمين )
وبعد ما تدخلون (ارقع ) ذيك الزغروته اللي تهز اركان البيت .. ثبت الله اركانك .
سواليف ليلة العرس :
1- الكثير من الشباب في أي المواضيع يطرح ليلة الزواج وبرأيي انه بالامكان طرح مواضيع تتعلق بذكريات الخطوبة ..
والابتعاد عن المواضيع الرسمية .. بمعنى تجنب الآتي :
2- انتبه تتميلح او تنكت اكثر من اللزوم لان الموضوع سينقلب ضدك وبدال ما تصير وش زينك تصير (كخا ).
3- انتبه تجيب طارئ (امك ) ليلة العرس ، وتقعد تقول لبنت الناس من اول ليلة
(انا بصراحه امي اغلى امراة عندي بالعالم )..
انا امي بصراحه ابيك تشيلينها فوق راسك ، انا امي بصراحه ما ابي احد يزعلها ، انا امي بصراحه مالها غيري<<<<
الله ياخذ بليسك انت وامك لا هالحين ادخل والسبك بالعقال يا ولد امك
مافيه شك ان الام قدرها غالي ومكانتها عظيمه بس لكل مقام مقال ..
فما فيه مناسبه انك تجيب طارئ امك ، ممكن تأجل الموضوع لليلة اخرى.
4- امدح مكياج المدام ، وفستان فرحها لانها تعبت شهور حتى تظهر بهذا المظهر
اللي انت تتمتع فيه انت وعيونك المغمصه <<<<<<<< هههههه..
حتى لو كنت (كمخه ) في مواضيع الذوق واللبس ولا تفهم فيها شيء
امدح وخلك عباراتك فيها صدق بحيث تكون (الكذاب الصادق )
فهذا من شأنه انه يحسس المدام انها جميله بعينك ، ويرفع روحها المعنوية ،
ويخليها تهضمك يا ابو كوع (بني ) <<< مفروك لين قال بس فتغير من اسود الى بني
5 – انبته ثم انتبه انك تصير عاطفي او تخق ومن اول ليلة تقول للبنت
(بصراحه انا احبك وميت فيك ) ..
لانها مؤكد انها مو مصدقتك (مامدى بسم الله تحبها )
بصراحه كثير من الشباب محروم من (كل شئ) <<<<< وافهموها .. عاطفيا ....الخ .
واول ما تلمس يد تختلف عن يد صديقك (التمساح ) .. تخق وبسرعه تسعبل وتقول : آآآه الله لا يحرمني منك ،
احبك احبك احبك .. ويمكن بعد اسبوع اكرهك اكرهك اكرهك.
6- خلك ثقيل وخلي سلوبك هو اللي يقول للبنت اني احبك مو اساليب (القردنه )
احبك بعدين تقول لها (وش رايك نلعب عريس وعروسه )؟ ترى هالحركات ما تمشي على البنات .
ملابس ليلة العرس :
1 - بعد ما تفسخ ثوبك وشماغك وعقالك .. تروش الله يصلحك لانه ممكن ريحة اباطك تكون طالعه وانت ما تدري
من كثر السلام والقلق اللي عشته في قصر الافراح ولا يهمك انك راش لك كم (بخة عطر )
2 - انتبه تصير قروي وتلبس سروال ابو حبل ذاك اللي يخليك كأنك بقره رايحين يبيعونها
او بيجامة نوم مخططه فتصير كأنك (حمار وحشي ) .
اختر اللبس المناسب لجسمك ..مثلا شورتات رياضيه اذا كان جسمك رياضي ..
وإلا اذا كنت دب فخلك بالعقال والشماغ والثوب استر لك وغير ملابسك إذا نامت المدام..وفاجئها في الصباحية .<<<<ههههه
إذا كنت سمين البس ملابس فضفاضة شورت وفانيلة دبل X X X L .
3 – للإحاطة فإن قمصان النوم النسائية (مشققه ) وشفافه وكلها حركات ..
انتبه يسول لك ابليس وتقول (افف البنت خربانه ) .. من هالحين لبست كذا ؟؟
ترى الموضة كذاااااا وتطوروا <<<<< تعبت اعلّم فيكم .
ما غير تمرون على محلات الملابس الداخلية وتفهون
4- إذا لبست لك المدام (قميص نوم رايق ) ترى مو معناهاااا (طب علي ) ..
خلك ثقيل <<<< وإلا جيت هالحين أربط ثقالات برجليك .
5- ترى سمعت بقصه ان واحد طلق الزوجه ليلة الزواج بعد ما شافها لبست له
(لبس مشخلع ).. قال العم : اكيد انها داشره ؟ وحركاتها ما ني متطمن لها<<<<<
طيب يا الطنطاوي ..
الخطة المحبوكه للقاء الحميمي :
1 - حذاري ثم حذاري وهذاني اقول لك (حذاري ) .. تتحرش بالبنت حتى لو كانت زوجتك ..
فكما يقال (احذران تبدأ حياتك الزوجيه بحادث اغتصاب ) .لان البنت مو معنى انها صارت زوجتك وكتبت هالوريقه
يعني انها فصخت الحياء وتبيها تصير لعبة بين ايديك .
2 - اجعل بداية حياتك الزوجيه قصة رومانسية متعددة الفصول ..
ليلة الزواج تكون بمثابة لقاء بين اثنين للتعارف ما فيه إلا الحديث وإذا كثرت امسك يدها
ولا تتعدى لاشياء اخرى يا خروف هههههه
3 - اليوم الثاني انتبه تستقبل أية زيارات من الاهل .. او من اهلها ..
واعزمها في مطعم راقِ ولا تجلس جنب النافذة وتقعد تناظر فيها مع هالجهه او مع ذيك ..
اركد وخلك طبيعي وإلا قالت البنت وش (هالمصيبه )
4 - في ليلة اليوم التالي غالبا يكون فيه عشاء عند اهل الولد تعشوا واطلعوا
ورح انت وياهااا (كوفي شوب ) وانتبه تقرأ الجرايد او المجلات* وعطها وقتك كله .
مسوي فيها مثقف .. الله يالثقافة5
5– اليوم الثالث :
حاول تسافر معاها زيارة لمكة او المدينة اما إذا كنت سربوت اطلع معاها لمكان ترفيهي
6 - اللقاء الحميمي لا يمكن تحديد الوقت المناسب له .. بل يعتمد على الظروف والمتغيرات
والتي لا يمكن ان اعرفها فأنت الذي في ارض المعركه ، فحدد أنت ؟
لانه لا يمكن يجي احد يحارب عنك . واللي ما يجي اليوم .. يجي بكرا .
كني اشوف بنت تقراء انا وش قلت هههههههههههههه
............................
منقول للفائده
