مره من المراريت اخذنا عمره
:d هالموضوع حطيته بمناسبة الإجازة للطلاب والمدرسين
>>اما انا الله يخلف
وكذلك زي ما تقولون مباركة لكل الطلاب الي نجحوا
والي رسبوا لا يقرونه >>> فاهميــــــــــــــــــــــــن:d
المهم سنتن من السنين شرينا جمس صالون 79 احمر وخط ابيض بالوسط
فرحوا اهلي فرحن شديدن
اول ماشريناه قام يهايط ابوي يعنني الموتر جديد
قال يالله مشينا لمكه نعتمر
قالت له امي : الله يهديك حنا الحين بالدراسه .. خل تجي العطله ويصير خير
>>هالكلام قبل العطلة:cool:
انتي ماتدرين .. الموتر جديد وودي امسه بالخط
الله من قل الدبرة في ابوي ..تمس الموتر على خط الحجاز؟!!!
انا خابر مس المواتر على طريق الرياض
وحنا وياوه لين أجل الموضوع
جت العطله وحملنا عفشنا ومشينا
تخبرون عقب ددسن ثلاث وسبعين جمس صالون 79 ... انوااااع الوناسه
طول الخط لمكه وحنا نتلاحق بغماره الصالون من الوسع
انواااع الازعاج
ماركدنا الا يوم اظلمت الدنيا
ناموا كل اخواني الا انا قاعدن بجمب ابوي يقالي معاوني
وين معاوني والدنيا كله ظلماء !! ماتشوف الا نور المواتر من بعيد ثم تخطم بجمبك
مطيرن عيوني يقالي منتبه للخط
احسن ماتعلمته من هكالسفره تدقيق الاشارات
اذا سقط ابوي على راعي تريله دق له اشاره يمين
في البدايه شكيت ان ابوي بياع
لكن عرفت بعدين ان معنى الاشاره اليمين يعني شكرا على انك خليتنا نسقط
مره من المرات وهقنا راعي مرسدس عايدي محمل حطب
دق اشاره يمين يعني اسقطوا
يوم حذف ابوي الموتر يبي يسقط واثر راعي تريله يمشي مليوووون
بغى يعدمنا
لولا ان ابوي رجع الموتر والا تسان علوم
المهم طول الخط وانا مطيرن عيوني بجمب ابوي
لا شربت ماء ولا اكلت شي كله من زود التحمس والفرحه
وابوي مغير يهيجني تسنه راكبن بعير
جمس صالون موديل 79 فاكينه جديد بقراطيسه ؟!!
مشكله اللي ينتقل من عالم الجمال لعالم المواتر على طول
مالكم بطولة السالفه وصلنا للميقات الساعه سبع الصبح
قلنا خل نفطر قبل نحرم [ الله من زين الزهد بالدنيا ]
لبق ابوي بعيد ونزّلنا قواطي القشطه والجبن وخبز العايدي
وافطرنا على خير
بعد ما افطرنا
دخلن الحريم حمامات الحريم وحنا دخلنا حمامات الرجال
حتى هكاليوم ماخط شنبي وبغيت اتهور وادخل حمامات الحريم :d
لكن قلت مقبلين على عمره وطاعه لا تخرب الدعوى
تعوذت من الشيطان ودخلت مع ابوي
اللي يشوفنا صفة بزارين مع ابوهم
تسننا ابو جاي يسجل عياله بمدرسه
قلت لابوي ابحرم مثلك؟
قال وراء ماتلايييط لا الفعك توك بزر ومابعد بلغت
قلت هماي معاونك البارح بالسواقه؟
يعني خلاص صرت رجال وكبير
انثبر بس .. بغيت تعدمنا البارح لفيت الطاره وانا ساقطن على قلابي وبغينا ندخل تحته
تبون الصراحه
عقب كلامه سكت ولا قلت شي لاني فعلا بغيت اعدمهم
لكن لاتلوموني كم ثوبي نشب بالعصا اللي يرفع الطاره وجريته وجت الطاره معي
المهم
قعدت اصيح عند رجلينه وفشلته قدام اللي بالميقات
حتى اني متعنقط بثوبه وبغيت ادخل معه للحمام - تكرمون - :p
حتى جاء بدوي وقال : ابك علامك انت وورعك؟؟!! تراكم ازعجتونا
رد عليه ابوي خلك بنفسك لو سمحت
شوي ويتلاقطون
فك الله ابوي والا انتسان فقع وجهه البدوي لانه كبير وجثه
تسان من يسوق بنا بالرجعه
لكن ربك ستر
المهم كسرت خاطر ابوي
وقالي خلاص ابخليك تحرم
وين احرامك؟
قلت مامعي احرام
ناظرن بعين قشراء ورجفني واثري طايحن بحضن سوري قاعدن يتوضى
عطاني غترته واحرمت بها
صحيح اني مافسخت سروالي لكن اهم شي الغتره شكلها من فوق تسنه احرام :d
تروشت ولبست الغتره قصدي الاحرام :d
ويعنني كبير قعدت البي بالعمره
اللي يشوفن يقول ذا مطوف مضيع الحرم
ماتسمع الا ازعاج بهالميقات
اشغلت العالم اشغال بالتلبيه
واشغلت اهلي بالصالون وحنا رايحين للحرم
حتى ان ابوي بغى ينزلني بالخط ثلاث مرات
لولا ان امي حلفت عليه
وصلنا الحرم وقعدنا ندور موقف يجي ثلاث ساعات
رقدوا اخواني
وانحاست احراماتنا
لين وفقنا الله ولقينا جحير يالله ياخذ موترنا
قعد ابوي يلفلف بالموتر ساعتين عشان يلبق
وانا نازل اناظر له واشاور .. تخبرون معاوني ولازم يفزع في مثل هالمواقف :d
صحيح انه حك بالجدار وبالمواتر اللي واروه وقدامه عشرين مره
بس ولو اثبت انه راعي طاره ولبق الموتر تلبيقه مهب صاحيه
اللي يشوف التلبيقه يقول الموتر منزل بهلكبتر من السماء
نزلنا ورحنا للحرم
قال ابوي انت ابو شوشه صرت رجال كبير امسك حدا اخوانك وانا وامك نبي نمسك الباقين
الحين صرت كبير يالمصلحجي؟!!
وين كلامك قبل شوي بالميقات ؟!!
تعوذت من الشيطان وقلت ابمشيه لك هالمره لكن لاعمرك تعودها...
عطان واحد من المبزره ومسكته مع يده
حسيت اني صرت كبير واتحمل مسئوليات
بيني وبينكم بلشت .. مدري امسك هالبزر والا امسك احرامي اللي كل شوي منصل...:d
لكن مالك الا الاجر
خلصنا عمرتنا
فيه مقطع بالقصه مستحي اقوله
انتم خابريني ما اقضب علم... :d
ابقوله والشكوى على الله
تدرون اني ضعت بالحرم انا والبزر اللي ماسكه
امحق تحمل مسئوليه
قعدوا يدوروننا ثلاث ساعات
عقب مالقونا صفقني ابوي تصفيق :mad:
الله لايوريكم
فشلني قدام معتمرين ايرانيين
التفوا علينا وقعدوا يشجعون ابوي وهو يصفقني
اللي يشوفهم من بعيد يقول هذولا متجمعين على حلبة مصارعة ديكه
بيني وبينكم ضعت غصبن علي
بيبان الحرم واجد وضيعت
ومعي اخوي الصغير
كنت متواعد انا وابوي عند الحلاقين اللي برا
لكن ضيعت الباب بكبره
كل ما ادخل مع باب يوديني بصحن الحرم
المشكله ادور عند باب واحد من الدلاخه
كان عند الباب عسكري من اهل مكه الظاهر انه قرشي
وكل شوي اساله
همن ارجع واساله ثانيه
ابلشته ابلاش انا والبزر اللي معي
اخر شي قالي : يابووووووويا انقلع عمى في شكلك ..
احنا ماعندنا الا انتا في الحرم هادا ... هيااااااا انقلع
انقلعت غصبن عني ودمعتي على خدي :(
صار البزر اللي معي يصيح من الضيعه وانا اصيح من الهوشه
حالنا يرثى لها
مدري وشلون طاحت عيني على محلات الحلاقين صدفه
ومير اركض يمهن
واثر ابوي عندهم من ساعه ينتظرنا
جان تصفيق الله لايوريكم
عقب ما تمردس بحوض بطني رحنا لم موترنا
لقينا الكفر مبنشر
وعنده مكاوي لابسن فنيله علاق ووزره :mad:
واثر ابوي من استدارة راسه من تدوير الموقف سد باب بيت المكاوي
لاحوووووووول هذي والله النشبه
ابوي على باله يبي يلخم الرجال ويبي يسوي فيها اخلاق
قاله: مسيك بالخير والضحكه شاقه الخشه مترين في مترين
رد المكاوي وهو مولع :mad: عمى بشكلك انت وبزورتك والمدام حقتك
رد ابوي : اها بس لا تهرج عن مرتي وام عيالي وحشاشة جوفي
[ مهب وقته يالرومانسي ]
قال المكاوي : انتا ماتشوف الباب حقنا ؟!! كيف تسكر الباب عساك البلا بشكلك ؟؟!!
بصراحه اول مره اشوف واحد ينفخ على ابوي .. احسب ابوي اقوى واحد بالعالم ..
طلع من جنبها
يوم شاف ابوي الدعوى قابسه حاول يلطف الموضوع :
يابن الحلال حنا ضيوف الرحمن ثم ضيوفكم ?
سامعه بالقناة الاولى في برنامج عن الحج ?
والدعوى كلها ساعتين وماتاخرنا
رد المكاوي: ساعه ساعتين مو شغلي.. انتا عطلتني عن موعد زيارة ستي في المستشفى
قال ابوي : يابن الحلال هذي اول مره .. المره الثانيه ان سدينا بابك ابشر بالحق ?
يحسبه بنجد حقوق وخرابيط .. مايدري انه عند ابوحجوز
قال المكاوي : المره هادي بنشرت الكفر حقك المره التانيه
راح ابنشر نافوخك انت وبزورتك والمدام حقتك ?
ياحووول يهالمدام كل شوي طابن في بطنها?
قال ابوي : ابشر
غيرنا الكفر المبنشر وركبنا جمسنا الصالون موديل 79 الاحمر والابيض
< = = مابقى الا تحط صورة الاستماره
>>>بس الدرج مقفل وجمسنا جديد ولا يحتاج نطلع الإستمارة من أصله
ثم رجعنا للديره
بالرجعه خلان ابوي اركب وراء مع البزران :(
يقول ماتستاهل تصير معاوني عقب اللي سويته بالحرم
طول الخط وانا حاطن يدي على خدي ودموعي اربع اربع ومغير اشاهق لين وصلنا
نقلها و كتبها الفقير إلى عفو ربه ابو شوشه
نسيت اسلم
السلام عليكم ورحمة الله وبركاته
