هنا تساهيل الزواج

قصة شبه واقعية
المشكلة الوحدة تتمنى اللحظة اللي يجيها عريس ...

وتقول في نفسها بس خله يجي وما أبي شي ، ورح أعين وأعاون إن شاء الله علشان ربي يبارك لي فيه ..


واذا جا العريس متعوس الحظ

قالوا ما نبي شي بس مهر عادي

وزواج عادي

طبعا العريس فرحان ، هو موظف على قد حاله وراتبه 4000 ريال وعنده كابرس مستعملة تمشي الحال .

اتفق العريس على استئجار استراحة بـ 2000 ريال علشان حفلة الملكة ( عقد القران )


وصل الموضوع لاهل العروس ، قالوا له يا إبني : العروس عندها صاحباتها وتبي مكان أفضل ، وانت عارف يا ولدي البنات والفشخرة ، وأكيد عروستك غالية عندك ،، يعني شوف لها مكان أفضل مثل الفندق الفلاني ..


قام العريس باع سيارته الكابريس بـ 25 الف ريال ، واستأجر الفندق فيها كلها علشان الملكة !!

وجاء العريس فرحان وقدم مهر عادي مثل ما قالوا له أهل العروس قبل الخطبة حوالي 15 ألف ريال


قالو له وش نسوي فيها الـ15 ألف ؟؟

ما تجيب لبنتنا شي

قام زودها 5000 ريال اخذها من زميله في العمل سلفة ، صارت عشرين ألف


قالوا يا ولد حنا بنتنا ماهي جاية من الشارع !!!

ادفع مهر مثل الناس والأوادم والا فكنا


قام الرجال استلف 10000 ريال من زوج اخته اللي كان معزوم في الملكة وعطاها اياهم

صار المهر 30 ألف ريال


قالوا له ، الله يعيننا عليك ، ترانا بنحط من جيبنا كثرها لكن مقبولة منك



طبعا العريس رح يعاني من نفسية محطمة من هالمشكلة المحرجة

طبعا بعد الملكة صار يبي يشوف عروسه ويطلع معاها ، المشكلة ما عنده سيارة
قام استشار رحيمه قالوا له والله بنتنا ما تبدأ حياتها معاك الا بسيارة جديدة ،!!

راح الولد جاب تعريف بالراتب وكفيل وطلع سيارة مازدا ( زوم ) موديل 2008 ، وراح فرحان يتمشى مع عروسه ، قابله والدها على الباب ، قال له وش هالسيارة اللي انت شاريها ، والله ما تسوى بنتي تركب فيها لكن الامر لله من قبل ومن بعد ( مطوع أبوها ) الله يعيننا على البخل .

طبعا الولد اكتأب ، بيدفع في هالسيارة نصف راتبه ( 2000 ) ريال قسط شهري ، وهذا حال أهل زوجته .

و المشكلة كل شوي يدق عليه زميله بالعمل يبي الـ 5000 ريال ونسيبه يبي الـ 10000 ريال ، والرجال منتوف وما عنده .

جا وقت الزواج وصاحبنا ما عنده ولا قرش . راح لخطيبته وقال لها يا بنت الحلال تراني طفران وش السواة ..


قالت له : بنات الناس مو لعبه عندك ، دبر نفسك .


راح الولد اشترى سيارة غمارة وباعها بـ 45 الف ريال وحمل نفسه قسط 1500 ريال شهريا .

صار يدفع 3500 ريال شهريا وما يبقى من راتبه الا 500 ريال .

استأجر شقة 3 غرف واثثها علشان الزواج ، كل هذا كلفه 40 ألف ريال ، وبقى معاه 5000 ريال .

طبعا تكاليف الزواج ما تقل عن 20000 لان أهل العروس يبون قصر معين .

قام الرجال راح لنسيبة ، قال له تكفى يبو مشعل ابوس راسك دبرني

قام قال له الله يعينك ما اقدر اسلفك ولا ريال ، وبعدين اطلبك 10000 ما وفيتها حتى الان .


الرجال راح لصاحب القصر ودفع له 5000 ريال مقدم وشيك بـ 15 الف ريال قال له بعد شهر .

المهم أخذ إجازة الرجال عشر أيام لان ما عنده رصيد اجازات غيرها و تزوج الرجال واللي عليه بالخير ، وانبسط وفي الليلة الثانية جاء ابو العروس وامها ، وسلموا عليهم والبيت خاوي على عروشه مافيه الا عصير ليمون .

قامت ام العروس ترمي عليه كلام ، الرجال بيني وبينكم تمسح ، بطل يحس !!

قالت العروس لبوها ن يبوي ترى زوجي ماله نيه يسفرني شهر عسل .

قال له ابوها وليش انت مع خشمك هذا ما توديها ؟

قال ابشر يبووو ( وش اسم الولد ؟. )
طبعا صاحبنا نسي اسم اخو زوجته من الصدمة .

راح يتسلف ما لقى طريقة ، قام ودى الزوم على الحراج وباعها بـ 30 الف ريال ، وحجز مع زوجته واشتروا تذاكر الطيران ذهاب فقط ، لانه ما حدد العودة وسافرو ماليزيا . والنية يقضون شهر العسر هناك .

ونسي صاحبنا انه ما عنده رصيد اجازات الا العشر ايام .

وقعد في ماليزيا شهر كامل ، وطبعا في عمله مادام غياب أكثر من 15 يوم متواصلة ، صدر قرار فصله ..!!

وهو مبسوط في ماليزيا مع زوجته وهاتك يا بذخ وصرفيات لين ما بقى معهم ولا قرش .

جات له فاتورة الفندق ما عنده يسددها !!

وما معه قيمة تذاكر سفر يرجع للسعودية .. قام صاحب الفندق اشتكاه للشرطة

قامت العروس عاد وتدخلت واتصلت على ابوها وقالت له الحكاية ..

قام راعي النخوة ما قصر وسافر على ماليزيا ..

ويوم عرف العريس اطمأن وقال جا الفرج الحمد لله ..

ويوم وصل نسيبه لماليزا اول ما قابلة تفل بوجهه وقال له منت كفو تسوي ببنتي كذه ، اول ما ترجع يا الهيس على السعودية تطلقها .

قال يا عمي وش هالكلام انا وعروسي نحب بعض ..

ردت عليه العروس : انت ما عندك سالفة ولابد تطلقني في السعودية

حجز ابو البنت لبنته ورجعو للسعودية وتركو عريس الغفلة في ماليزيا ..

وشوي جو الشرطة واخذوه للحجز ..


وانتهت القصة اللي ألفتها على التو بنفسي هاهاهاها

هذا حال الشاب اللي يتزوج سعودية

سلفيات وأقساط وفصل من عمله وفي الأخير سجن هههههههههههه

وشكرا على اطلاعكم

شكرااا الباحث وانشاء الله يرزق الجميع الصالحة

كيف الحال وش الاخبار اجلس معنى نبي انسولف