نزعل ونتكبر وحنا من الطين

نزعل ونتكبّر وحنا مـن الطيـن والكل منا صـدّ لا أقبـل خويّـه
نفخر نقول: إنا على الصد قاوين وهيّ علينا فـي الحقيقـة قويـه
نشفق على الطيبة وكسب الكريمين وهذي بنا لاشـك فعلـة رديـه
ننسى نهايتنا وعلى وين ماشيـن وننسى الزمان اللي جمعنا سويـه
المشكلة ماهي بحاجـة لتخميـن ولاهي بعد ياناس صعبة القضيه
دق الرقم : كيفك هلا فيك وأهلين أنا الخوي اللـي مزعّـل خويـه
قلّه : تغيب وصورتك داخل العين ويبقى لـحبك في خفوقـي بقيـه
أخوان حنا لو يجي بيننـا شيـن و مانفتـرق دام المحبـة نـديـه
خلك قوي لاتحتكرك الشياطيـن قبل الفوات وقبـل وقـت المنيـه
كلّم خويك باطيب الهرج والليـن وأعرف جميل الهرج يمسح رديه
هذي هي الدنيا من الحين لالحيـن لابد بين الناس تحصـل خطيـه
ومن لايقدّر غلطة أحبابه الحيـن يقرأ حروفـي ويعتبرهـا هديـه
باكر تمر سنين وسنيـن وسنيـن والكل يرحل في الدروب المديـه
صدقني تندم وأذكر حروفنا زيـن تندم على خلك إذا غـاب ضيّـه
دنيا غريبة وأكثر الناس ماشيـن وكم صاحبٍ والله دفنتـه بيديـه