أنام ُ ملء جفوني عن شواردها .. ويسهر (الـ صـُـفـْـر ُ) جرّاها ويختصموا !!
لو إن الشاعر داري إن الهلال بيفقع مراراتهم ويبي يصير ( زعيمهم ) لـ 100 سنة !! كان خلا البيت :
فـ حظي مثل ( وجهي ) مثل ( قلبي ) .. سواد ٌ في سواد ٍ في سواد ِ !!
بس المية سنة تـمّر و يا سرعها على الحي المتعافي !! ويا طولها على (المصّخن) طولااااااااه !!
للمعلومية بس .. ترا الهلاليين ما طايروا ونابحوا .. وشرالهم رئيسهم (بـ هبشة دراهم) بطاقات شحن .. وخذ يا تصويت !! ولا ثبتــّوا بمنتدياتهم وشلون تمسح ( الكوكيز) وتصّوت إلين تغدي خشتك شهبا !! ولا طقوا صدورهم بمجالس الرجاجيل .. وقالوا جيبوا (زغبي) واللي بيقط يقط واللي تراي بنجيبها على حسابنا !! و بنفعل ونترك .. وبنشيل ونحط !! الهلال عنده ( 90 دقيقة على مستطيل أخضر) يحوس مريركم ويمشي !!
جاه ( اللقب ) اللي طلعكم عن طوركم !! وهو يردد بيت المتنبي :
أنام ُ ملء جفوني عن شواردها .. ويسهر (الـ صـُـفـْـر ُ) جرّاها ويختصموا !!
وهذا اللي صاير !! صغيرهم وكبيرهم !! شايبهم وبزرهم !! اللي (مايفهم) واللي (مايفهم) !! وكل العالم مخترشه !! تسنهم ما قد شافوا ( زعيم قرن ) بحياتهم !!
-----------------------------------------
-----------------------------------------
اللي قاهرني بالـ (صفران) !! إنهم يعرفون (الكفت ) !! و بهم ذهانة ترّوع !! وبدري عليك تلعب عليهم .. وش اللي تمرّر عليهم شائعات !! ولا همب يواطنون (تصويتات) وما تصويتات !! وأي (كوكيز) اللي تتكلم عنه أنت وأياه ؟! وبالنسبة للتصويت اللي برعاية ( بيرة بربيكان ) .. وعن طريق موقع (المذيع الشخصي) .. تراه تصويت(نزيه) .. يخوك يكفي إن (البيرة بدون كحول) واللي مهوب مصدق ياخذ جغمة !! وأخذ لاعبهم أطلق لاعب (عايش حياته) .. وخذ يا تبريكات وعزايم باستراحات !! بس من حقـهم (لاعبهم) وينبسطون فيه على كيفهم !!
-----------------------------------------
-----------------------------------------
هذا سلمكم الله بزر(ن) وش حليله .. ينقال له ( حموّدي ) .. حموّدي (أصيفر) طالعن على أبوه !! كانوا جالسين عند تلفزيونهم (الأصفر) .. ويا كثر (التلفزيونات الصفر هاليومين ) !! والأبو حاط بشليله لاب توب .. مزبرقه بشرطونات صفر .. وفاتح على (منتدياتهم) وقاعدن يقرأ وكل ما قرا حرف .. قال (أي والله صدقت ) ؟!
خش عرض (حموّدي) وقال وشو يبه ؟!
التفت الأبو على حموّدي وقال له ( أنت تدري إن الهلال متأسس 1957 .. يعني في النصف الثاني من القرن !! وبعدين يقولون أول بطولة 1992 .. بالله وشلون يصير زعيم القرن أجل ) ؟!
قال حموّدي : إيه عادي يبه .. حنا درسنا إن القرن هو الـ 100 سنة !! يعني (هالقرن) له بداية ونهاية .. يبدأ بـ 1901 ويقضي نهاية 2000 .. وبما إن الهلال هو أكثر من سيطر فشيء طبيعي ياخذ الإنجاز .. إن بغى مالعب إلا بآخر شهر من عام 99 !! وش رايك أجل نفتح لنا منظمة عالمية ونسميها ( حموّدي وأبوه ونقعد نقيّم العالم ونعطي ألقاب على كيفنا) ؟! وبعدين ورا اللي أقراه في دراستي ويفرضه المنطق هو الغلط واللي نقراه في منتدياتنا هو ( الصح ؟! ) !!
انطم بس وأنا أبوك .. والله إن هالحملة اللي ناشرينها بالمنتدى ويقولون ( إن جماهير الأصفر تغيرّت للأسف ) !! كنهم دارين إن عندي (ثور) ما عندي (ولد) !!
الله يبشرك بالخير يبه !! نبتل نردد (إشاعاتكم) و (خنبقتكم) !! إلا كانك تبي تغيّر اسمي من حموّدي لـ ( كرتون) !! فأنا مستعد أصدّق أي حرف تقوله ولا أناقشه !! وتصير أنت (أبو كرتون) .. وتبقى الجماهير على ماهي عليه .. عشان تستانسون ولا يصير في حملات ووجع راس بالمنتدى !!
دامني وأنا أبوك ما رصيّت وجهك على جنط الددسن وهو حار ما راح تتأدب !! هماي قايلن لك (لا ترادنـّي) !! وبعدين كل العالم يرددون في الجرايد والتلفزيونات والمنتديات إن موقع الإحصاءات موقع (تجاري) ؟! يعني الدعوى (أدهن السير تمشي أمورك ) ؟!
خخخخخخخخخخ يا أخي أنت أزحف ( أب ) في الدنيا !! وشلون موقع (تجاري) يبيع ( صلصلة ) مثلا ً ؟! وإلا ( ورق سمبوسة ) ؟! وإلا وش معنى تجاري !! وبعدين إذا هي على دهنة السير !! ورا العالم كلها ساكتة ما به أحد يصارخ ويزاعق إلا (حنا) !! تصدق بديت أشك إن كلامك صح !! والحين الهلاليين عندهم أزمة مالية !! شكل هالدراهم اللي على ظهورهم (هي اللي عطوها حقين الإحصاءات عشان يعطونهم اللقب ) هههههه !! طيب من عطوها بالضبط ؟! وإلا جايبينهم كل أعضاء هالمنظمة اللي موزعين من كل الدول .. لاستراحات كبري الفحص ومعطين كل واحد ظرف فيه مليون !! وش هالمليون اللي بتجي بظرف !! طيب محولينها على حسابهم !! اللي في مثل هاللجان تراقب حساباتهم أي تلاعب أي خنبقة يقضبونهم الباب .. وهناك العالم مستقعدة لمثل هالتلاعبات !! طيب هم نشروا الأرقام والانجازات والتواريخ والمعايير !! وهم ماهمب موقع (تشات) وإلا موقع (ملتقى بزارين) هم .. (موقع رسمي ) يتبع لـ فيفا !! واللي عنده استفسار .. يروح لمقرهم .. (مهوب موقعهم التجاري) !! الموقع (نشر أخبار هالمنظمة لا أكثر ولا أقل) !! شفت إنك (أزحف أب) !!
ألفقه بس !! ووالله إنهم ماكذبوا بهالخبر .. اسمع اسمع .. ( البحري كان أساسي في المنتخب .. ويوم أنتقل لنا استغنوا عنه !! و عبدالغني قائد .. ويوم جانا استغنوا عنه ) !! شفت إننا ( محاربين وأنا أبوك ) !!
اسمع يبه أنا سامعن أنه يبي يستغنون عن (المصيبيح) و (بيسيرو) !! يالله طق لك تكميلة سماوي مقلمـّة ببيج وأنا أبضبط (بنت البكـّار) ونصير بدالهم !! البلاء مهوب بالاختيار !! البلاء بلعيبتنا ولو بهم خير مهوب نبي نطق حول 15 سنة ما حققنا ولا مقص ظفور !! .. هماك دايم تقول لعيبتنا (كديش) !! فلو تجيب (كرستيانو و هنري) كان ( كدشنــاهم ) !!
قم طس بذاك .. الشرهة مهيب عليك الشرهة علي اللي حاشم بزر !! وبعدين وش هالزعيم اللي منهزم من أم صلال !! لو به خير وصل !!
بذي يبه حجّرت لي !! طيب أم صلال وصل الأدوار النهائية لبطولة آسيا !! حنا وين وصلنا ؟! نهائي بطولة الصداقة ؟! حتى ذي بعيدة عن شواربنا !! ويا ما أكلناها بالثلاثات والخمسات مع فرق أول مرة تشارك آسيويا !! ودام أمل صلال هزم الهلال .. ورا الهلال موكلنــا هواء من ست سنين !! كاظمة الكويتي واطينا وطي !! وأكبر نتيجة في تاريخ هزايم الكرة السعودية كفارق أهداف اللي أكلناها (خمسة من نيسان الياباني) !! وبعدين عيب نقارن نفسنا بالزعيم وبطولاته !!
العيب والله إن عندي ولدن مثلك ولا بعد ربطته مع ساقه بصدام الموتر وأخذت به لفة !! كل العالم تبينا وتحبنا حتى ( حقوي ) تراه جدّد للرابطة .. ويبي يستمر !!
طقاقات ذولا مهوب حقين رابطة !! ما بقى إلا يغني لنا ( كل النصر خيـّـالة !! ويا زين حموّدي بينهم ) !! حتى المشاعر تنشرى هذا اللي يغبن الواحد !!
أنت وش جاك ؟! تبي تقنعني إن الهلال يستحق الإنجاز القاري العالمي !! وهو له أكثر من ثمان سنين ما حقق بطولة خارجية ؟!
أنت اللي وش جاك !! شف وش كبري وأدري وش معنى ( قرن ) !! أبتل أعيد عليك الكلام !! هذي تنحسب للهلال مهوب ضده !! وهذا دليل على الفرق الشاسع بينه وبين فرق آسيا !! له 8 سنين ما حقق بطولة خارجية ومع ذلك متربع على عرش آسيا !! ههههههههههه أما أنت يبه تفتــّح على نفسك بيبان مصككه .. ياليتك ساكت !! وبسم الله علينا اللي يشوفك يقول : قبل أمس مبارين على أبطال آسيا !! آخر مرة مسكنا ميدالية قبل لا يطلعن الجوالات !!
انتهى الحوار بعدما ما مزع الأب ُ فلذة كبده ( حموّدي ) بجهازه المحمول !! الذي أبى أن تنطلي عليه ألاعيب ُ ( المهرّجين ) و خزعبلات (المُمطرسين ) !! رفض(حموّدي) أن يجعل من رأسه (مكبــّا ً) لنفاياتهم .. وملاذا ً لأضغانهم وأحقادهم !! فأرتسم على جبين (حمّوي) صعرورا ً .. يحكي للعالم قصة الانعتاق وتحرير العقل من (ترديد نعيق الغربان ) !!
مغاط
عضو مجموعة أقلام زرقاء
منتدى الجمهور الهلالي
