تحذير :
هذه النسخة للعرض المنزلي والي بيشغلها في قهوه والا شي فترا لا يلوم الا نفسه وهذا تهديد صريح مني . ( وتراني علمتكم ) .
تنبيه :
القصه حقيقية واي تشابه في الشخصيات والاحداث مع احد انا مالي علاقة فيه .
تحذير ثاني :
القصه قاهرتني ( خشة واحد عيونه حمر ) وعلشانها قاهرتني اخاف انها تقهر احد ثاني عنده ضغط والا سكر ويروح فيها وهو ما بعد استلم بدل السكن , فعلشان كذا احذركم يا اصحاب الامراض اعلاه ,, ترى مالي خص وكل الي بأسوية ا ن الي بيموت بقول الله يرحمه .
القصة بدت قبل كم يوم من زماااان :d في المخازن الكبرى الي في الخبر ( الي عندها عربانه كبيرررررره ) _ ابوك يالوصف _ المهم وانا بأدخل السوق استقبلني واحد طلب مني دئيئة ( دقيقة ) من وقتي ,, وعطاني استمارة طلب مني اني اعبيها تخص مكتب سياحي أو سفريات ,, وبما اني خجول واستحي طاوعته وجلست اعبي الاستمارة وهو طبعاً جالس على راسي يقرا ( ويارب تربح معنا اصل بمجرد تعبيتك للاستماره دي حتدخل معنا السحب على الجائزة ) وبعد ما خلصت اخذ ارقامي وشكرني .
رحت من عند الرجال وخلصت شغلي ونسيت الموضوع لآني متعود على ها الأشياء اولاً ولأن خشتي مهيب خشة فوز ثانياً .
وبعدها بفترة و حول الساعة وحده الظهر اتصلت علي المدام :d علشان تزف لي الخبر السعيد ....!!!
افضل مبروك .... مبروك على ايش قالت ربحنا اقامه في منتجع لمده تتراوح من يومين الى خمسة ايام في أي مدينة من هالمدن ( الخبر , جده , مكة , الطايف , الرياض ) في أي وقت انت تحدده !!!
قلت في نفسي : شكل البنت انهبلت مسيكينه من يوم اعرسنا وهو ابعد مكان راحت له الثقبة وقامت تحلم بالسفر هديتها وطلبت منها توضح لي اكثر .. قالت لي : ان فيه وحده اتصلت على تلفون البيت قبل شوي وسألت عنك ( قهر ):mad: وقالت لي انا فلانه من المكتب الفلاني ( تحتفظ الجريده بأسم الموظفة والمكتب ) وقالت لي : بأننا ربحنا وما علينا الا زيارة المكتب اليوم بعد المغرب كلنا ( يعني انا والمدام والبزران ) !!!!
طبعاً ما اخفيكم بأني في البداية ما استوعبت الي قالته لي المدام وخصوصاً انها كانت تمشي ميه وستين وهي تحكي ,,
المهم اني صرفتها وسكرت الخط . وصارت كل شوي تتصل مسيكينه وش رايك نروح جده والا مكة علشان نعتمر والا الرياض علشان اشوف اسواق دله ( خشة واحد يدلع لسانه ) هذا غير رسايل الغزل الي استلمتني فيها ( الله يخلف على ام ..... )
بعد ما رجعت للبيت ,,, وانا جالس اتغدى طلبت من المدام تعيد الي قالته لي بشويييييش وتفهمني
فقالت لي الي صار ان وحده اتصلت وقالت اننا ربحنا اقامه في منتجع سياحي بس لازم نجي اليوم كلنا علشان نستلم الجائزة .
طبعاً يوم تأكدت من الخبر وان المره مافيها شي وسليمه وبكامل قواها العقلية .... اعلنت حالة الطوارئ في المنزل وبدينا نستعد للوقت المحدد وانخرش البيت فوق تحت الشغالة تطارد ورا البزران علشان تلبسهم والمرة شبت في عمرها وانا اتسدح واتبطح تحت الاسره ادور كنادري ( تكرمون ) لييييييييين جت الساعة خمس لين حنا جاهزين تقول بنروح لعرس :rolleyes: ...... هنا انتبهت لنفسي وطرا علي انه ::confused:
ليه نجي كلنا ؟
ليش مو انا لحالي ؟
وش دخل المدام والبزران في استلام الجائزة ؟
هل حضورهم ضروري لها الدرجه ؟
( احلى يا فيصل القاسم ) المهم قلت ورى ما اتصل عليهم واتأكد بنفسي وخصوصاً انهم تاركين رقم التلفون .
اخذت الرقم واتصلت ,, وادخلت رقم التحويله ,, ورد علي واحد ( لا يا شيخ ) عرفته بنفسي ,, رحب فيني وكرر دعوته لي وللاسرة ,, قلت له ليه الاسرة قال هذا شرط ,, وكلها دئايئ ( دقايق) حتشرفونا حنعرض عليكم برنامجنا وتستلمو الجائزة وبعد كده بالسلامه .
انا من يوم قال حنعرض عليكم برنامجنا حسيت ان الموضوع فيه انا:cool: ,, بغيت اهون ,, لكن من باب اللقافه :) قلت خلنا نروح ....
ورحنا حسب الموعد ووصلنا للمكتب ودخلنا قابلنا واحد كاشخ ,, استقبلنا بأحلى ابتسامه ورحب فينا وودانا لصاله فيها طاولات وكراسي كنها مطعم خمس نجوم ( بدون مبالغه ) اضواء خافته وموسيقى هاديه وجو رومنسي على كيفك ,,
دخلنا الا المكان مليان عوايل مهوب حنا بس كل عايله جالسة على طاولة وعندها واحد من اصحاب المكتب ,, والعالم كلها كاشخه ( من جد ) وانواع العطور حتى البزران مترسمين وقاعدين بأدب ( ايه هين )
المهم قعدونا على طاوله وقدمو لنا اثنين شاهي ما شربناها علشان البزران كبوها على الطاوله ( ساد ) طبعاً ماراح اشرح لكم وش الي صار بسبب ها الموقف ,, المهم بعد شوي جانا واحد وسلم ورحب وجلس ومعه مجموعه من الاوراق والكتيبات وبدا يهذر عن مكتبهم وبرنامجهم والعرض الي عندهم وان لك حق الموافقه او الرفض بس فوراً يعني ماتروح وتقول ابرد عليكم بكره يعني لازم الحين ,, حتى لو قلت لا ,, راح تستلم هديتك انت والمدام الي ممكن يوصل سعرها ل15000 ريال وتتفضلون بالسلامة ,, وبرنامجهم يشمل على اشتراك او عضوية , بموجبه يعطونك بطاقه تخولك الدخول لآي من منتجعاتهم المنتشرة في انحاء المملكه , طبعاً الدخول مجاناً ( ياسلام ) وانك اذا دخلت تقدر تسكن عندهم ( لا يا شيخ ) واذا سكنت عندهم تقدر تستخدم النادي الصحي والمسبح ( احلف ) ,, وان سعر ها الحكي الي هو قاله والي ما اشوف فيه شي جديد او مفيد قبل ها العرض عشرين الف ريال بس لمدة سنه ,,, ولكن وبمناسبة ها العرض سوينا تخفيض كبير وكبير جداً وراح نعطيك كمان 100كوبون تستخدمها للسكن يعني فيه شاليهات تاخذ منك 10 كوبونات وشاليهات تاخذ منك اكثر على حسب مستواها ,, طيب كم ,,
قال اهم شي انت مقتنع بالي قلته قلت ايه بس اخلص ( بدت الاخلاق تخرب ):mad: قال دقايق ,,,, وقام ولطعنا كم دقيقه ثم جا ومعه واحد ثاني شايل معه لاب توب عرفنا عليه وجلس ابو لاب توب وفتح جهازة وبدا يهذر الاخ وشكله بيعيد نفس الكلام الي قاله الاخ الي قبله بس مع استخدام وسائل شرح اكثر تقدماً !!!!! :eek:
طلبت من الاخ التوقف لآنه خلاص الوقت طال وقلت عطني الزبده قال ها العرض الي حنا مسوينه نزلنا المبلغ من 20000 ريال الى 5000 ريال بس ( يابلاش ) ,,,
طبعاً رفضت العرض لآنه وببساطه من يضمن لي اني ابستخدم ها البطاقه خلال العام ,, بأمانه كم مره الواحد يروح لمنتجع من ها المنتجعات خلال السنه الواحده ,, طبعاً انا اتكلم عن الطبقة المتوسطه من مجتمعنا والي هي الغالبيه العظمى ,, يعني ممكن ها الخمسة تروح كذا .. بالاضافه انه في ذيك الايام ما بعد استلمت بدل السكن ;)
المهم اني رفضت وقمت بأغادر قال لي : طيب تفضل استلم جائزتك ,,
تخيلو وش الجائزة ,, اقامه لمدة ليله في غرفه وسط الاسبوع يعني تجي الخميس والا الجمعه نقول لك ضف وجهك وها الحكي خلال شهر من تاريخه في منتجعهم الي بالهاف مون .. في ذمتكم الواحد يروح هاف مون في هالبرد وش يسوي !!!!! وبعدين وش حلوك وانت رايح لمنتجع كله شاليهات وتسكن في غرفه ....
شي يقهر اكثر من ساعتين من القرقه والهذره الزايده .. غير حرق الاعصاب الي قبل .. غير اني اجلت زيارتي لآهلي بسببهم .
ما ادري وش يمكن نسمي الشي هذا ,, هل هو نصب والا ابتزاز .. المشكلة انه وعلى حسب كلامهم ان فيه عقد توقع عليه مصدق من الغرفة التجارية !!!!!
صدقوني طلعت من عندهم وانا احترق وودي اولع فيهم وفي مكتبهم ,, يعني ما ادري ليه اللف والدوران ليش ما قالو ها الكلام في التلفون والا الاخ الي خلاني اعبي الاستمارة في المخازن قال ها الحكي والا لازم الكذب والنصب ,, يمكن عاجبهم جرجرتنا انا والعائلة واصرارهم الغريب على ضرورة احضار العائلة ,, والا اوقات الناس مش مهمه عندهم .
شي يغيظ والله .
اسف على الاطالة بس حبيت اتكلم ........
وتحياتي للجميع ,,,,,
ما يستفاد من القصة
- القهر وا عذاب الي يدله .
- الخجل ما ينفع دايم .
- طلع مرتك ومشها علشان ما تنهبل الضعيفه .
- لا تعطي احد تلفون البيت عطهم الجوال علشان ما تضيع عليك الفرص الثمينه .
-
- الي فوق انا مخليها فاضيه ( مزاجي ) .
- يوم اتصل على المكتب كان الغرض ان ذيك هي الي ترد
- يارب انهم يطيحون في واحد(ن) ممرور يعلمهم السنع .
- صدقوني القصه حقيقية ,, اتمنى انكم تعطوني رايكم والحل لأني من جد مقهور .
