عنوان هذي القصة : انا و الفكس

( الفكس هو دواء لكل داء ويستخدمونه كبار السن بكثرة وهو عبارة عن كريم شديد الاشتعال بالغالب تكون لون العلبة اخضر )



<= من جد يا حظ أهلي فيني الحمد لله اني جيت عندكم في المنتدى عشان أعلمك

<= لا احد يشره قولو الحمد لله على العافية وأدعو ربكم لا تصيرون زيي

المهم مالكم بالطويلة جتني فتره دايم اطلع للبر أما كشته وهذي وحده من القصص

(منتب عاقل يا ابن بطوطة أقول اسكت يا البطة )

قبل كم سنه كنا طالعين للبر معي اخوياي تعرفنا على مخيم جنبنا شباب

والله ونعم على نياتهم مررررره ونعم فيهم

(كنا نتسلف منهم صلصة طماط وماجي بالعربي كنا عاله عليهم )

واحد من الشباب ألي تعرفنا عليهم كل يوم يقول آه آه يا رأسي ما قدرت أنام الليل

من الوجع عاد انا حامت تسبدي من كثر ما اسمع الكلمة هذي منه

( عاد أنا صاحب احاسيس مفعمة بالرقة )

قلت له وأنا امزح هاه تبيني اكويك؟!

إبليس قال لي اعقل يا شيخ اتقي الله

قالي الرجال أنت تعرف با العلوم هذي

قلت له افااااااا عليك

( عاد أنا ما فيه شغله إلا اعرف لها ما عمري قلت لااحد ما اعرف صراحه أخاف على برستيجي الاجتماعي )

<= (متعقد من كلمه ما اعرف )

قال اجل تكفى يا يا فلان الحقني قلت ابد جاك ما طلبت شيء

قلت يا شباب فزعه شبو لي الضو لزوم العملية

(شعور رائع لما تمارس هواياتك الطبيه)

اه بس على معهد البريد ولا انا لحين جراح قلب مفتوح

أنا خابر في السيارة سيم حق الملابس والفكس هذا شيء أساسي في الرحلة أهم من السيارة


(سيم : يستخدم في الغالب لتعليق الثياب ويسمى معلاق, الفكس : تم تعريفه فيما قبل )

<= ( انفع مثقف )

قلت له أنت وين تبيها (تحس أنى متوهق من سؤالي )

قال لي أنت ابخص قلت يمدحون الظهر (الدعوة اختيارات )

قلت سم بالله وجهوه يا شباب على اتجاه ألقبله (مسلخ ههههه )

قلت لشباب ألي معه فزعه امسكوه

( مهب خوف عليه بس خايف لا يتوثم ببطن ويعيث الفساد بوجهي )

( يتوثم = يخلي وجهي دفتر مربعات وجه ووجه )

(يعيث = مادري بصراحع بس جازت لي )

أنا كويته أول مره ما أشوفه زاعق ولا صاح قلت يمكن أن الكويه ما ضبطت

ولحقته با الفكس على الكويه

(ألي جنبي قال آح وهو ماله دخل )

( اح : تقال عاده عند الاحساس بالوجع )

(أحس انه اطلعت لي أقرون وذيل)

الرجال بعد الفكس ما عاد يشوف أنحول صار يطامر تقل أرنب هنا

وهناك خمس دقايق بس ويهجد ويبدأ يزبد تقل بعير ويطيح بالأرض هو مات هو نام ما ادري !!!

<= (لازم نعطي الموضوع لمسه انثويه اخاف تزهقون من صدام التماسيح )

وأنا خفت بصراحه و الركب صارت جلي من كثر ما اتخابط بعض من الخوف


و حتى اخوياي قالو لي لا تصير بس ذبحته قالت لهم وش درأكم انتم با الطب الشعبي

<= لاخر قطر عنيد

قالو لي على هامان يا فرعون قلت يا شباب أدعو لرجال أن الله يقومه

بسلامه مره 13 ساعة والرجال هو نايم هو ميت الله العالم

أنا كنت أجهز عفشي وازبن انعيلاتي أبى اهج

( ازبن : اخفي الشيء )

انعيلاتي : تدليع انعال ما يلبس اسفل الرجال وسبب التدليع هنا لما تتكبده النعال

من الم ومشقه وتستخدم احيانا في فرض الديمقراطيه الاسرية في البيت من قبل الاب

قلت في نفسي الرجال دخل في غيبوبة وأنا رحت فيها

<= حس بعذاب الضمير متأخر كالعادة

ما دريت ولا هذا الرجال يركض ويطامر ويقول أنا اشهد انك ذيب ولد ذيب

قالت له وش صار قال أحس أن رأسي صار صافي

( قلت صافي ولا مراعي )

<= ما يتوب


قال لي ابشر با الي أنت تبي

قلت لا شكرً أبى الأجر من الله

(ومناك أبى أصيح من الفرحة )

قال لي ليه ما تسير علينا بالديره الشياب كلهم يشتكون من الوجع

قلت له إن شاء الله امركم الشهر الجاي

(قال مر علينا قال ... العطه يا بطه )

طول طريق الرجعة وأنا أتحمد ربي أن الله سلمه ونجاني

بس مشكلتي ما عندي خاتمه اختم بها القصه

يا شين القافه



كيف الحال ؟