السلام عليكم ورحمة الله وبركاتة

أسف على التأخير بسبب انشغلي

أيه هين

المهم انتم عارفين الأجزاء السابقة من رحلتي

وهذا أخر جزء

والي أول مره بقراء الموضوع يروح الله لا يهينه يشوف الجزاء الأول ما فيني حيل أحط الروابط

ايه وصلنا يوم قال لنا رونالدو يالله اندزلعوا وصلنا جيت بأنزل لقيت الدنيا زحمة

يمكن تقولون اكيد زحمة لن العالم ينزلون شناطهم من الدروج اللي فوق بس لااااااااااااااا

الزحمة كانت علشان الركاب كانوا يبغون ابو ضروس رونالدو يوقع لهم

قعدت انتظر وانتظر وانتظر لين خلصوا كلهم وجا في وجهي رونالدو

قال لي وين تبيني اوقع على الفنيلة ولا على الشنطة

انا:

رونالدو: يالله اخلص علينا انا منيب فاضي لك العيال مجتمعين في الاستراحة و روبرتوا كارلوس ازعجني كل

شوي داق عليّ

انا: اذلف يا رجال الله لا يبيك لا انت ولا توقيعك

رونالدو: هاه

انا: ما ابي توقيعك

رونالدو:

رونالدو: لا لا لا ما يصير ابي ابوي ابي امي ابي ببسي

المهم مشيت يا طويلين العمر وقعدت الف الف مع ها الاسياب اللي يقولك رح يمين ثم لقيت اللوحه مكتوب فيها

((اوه معليش غلطت رح مع الجهة الثانية ))

يوم وصلت للجوازات طبعا لنا يا الجدد صف خاص فينا

شوي وألقى واحد يقول: يا جماعة والله ما ادري وش تقول ذي احد يفزع لي

فكر الذيب ابوشوشه <---- اللي هو

وقال يا ولد اذا رحت فزعت له يمكن يخلونك بعده وتفتك

ويتقدم الفتى المغوار ابوشوشه الى الكاونتر وقال:
Yes I can help

راعي الجوازات قعد يناظرني ويقول : وش يبي ذا


وأبو الشباب يخرط على من جيت يقول وراهم ما دخلوني وش سويت

المهم بعد اخذ وعطى تبين ان ابو الشباب ما عطاهم تصريح القبول من الجامعة

انحلت مشكلة الرجال وراح

قلت في نفسي ياهوووه جا دوري

مديت له جوازي طالعني

وقال: لا مهوب دورك ( يعني ليس دورك )

انا:

وارجع لمكاني اجرجر أذيال الهزيمة والباقين قاعدين يساعدوني في جرجرتها .

المهم بعد حول النص ساعة وقفة وصل دوري وانبسط

عطيته الجواز اخذه وقال يالله رح

انا

قال وش فيك؟

قلت والجواز كيف اروح للفندق بدونه

هو: ههههههه تحسب انك قضيت

لا يا بابا دا بوعدك

انا : هووووو وراه يا كافي

اذا كنت ما عرفتني ترى اسمي ابو التونة <----- يقال لك الاسم بيفزع له

قال ابو التونة ولا ابو الخيار منتاب قاضن الحين ( منتاب يعني ما فيه أمل تخلص )

قلت له وين اروح

قال لقسم الهجرة.

رحت لم الشباب في قسم الهجرة لقيت رفيدزنا اللي ساعدته قاعد يخرط معهم وهو خالص قبلي بنص ساعه

يوم شافني قال :جابك الله ياخوي

انا: خير ان شاء الله

هو: تعال تفاهم معهم ناظر وش يبون

انا: يا راعي الهجرة وش ناقص الرجال؟

راعي الهجرة: ورقة القبول من الجامعة <---- نفس الورقة اللي فوق

عطيته نظرة حقد

هو عرف انها نفس الورقة بعد النظرة

خلص الرجال وراح

قضيت أوراقي وانبسطت قلت يا سلااااااااااام الحين بأروح الفندق واسحبها نومة للصبح

شلت شناطي ودرعمت ( درعمت يعني دربيت دمجتي فهمتوهاا )

ما ادري الا و 3 سيكيورتية يطاردوني

التفتت عليهم الا واحد منهم مطلع العصا

وانطل كل الشنط اللي في يديني

الا شنطة اللاب توب اخذتها في حظني

============

خروج عن النص:

يا ناس والله نشبة ها اللاب توبات

ماهيب اللي تنرمى خوف انها تخرب ولا تنكسر

ولهيب الخفيفة اللي تنشال دايم

علشان كذا دايم ابلش واحظنها

طبعا استفيد منها كدرع

( عرفت الحين يا رحااااال ليش شايله )

====================
عدنا

لحظه قبل نعود

هذا اتاريى يعني بلاس تشين



<======= ما لحقت على البلاست تيشن

عدناااااااااااااااا
=================
قالوا لي وين رايح

انا: للبيت <--- وصف سريع لحالتي ( واحد كبير ركبة تتنافض حاظن شنطة وفيه شنطة ثقيلة واطية رجاله
بس من الخوف ما قال شي والعيون ثلاث ارباعها دموع)

السيكيورتي: رحت للتفتيش؟؟

انا: لا

السيكيورتي: طيب ليش طالع؟؟ ولا علشان يقالك مشهور بتطلع على كيفك يا ابو التونة


انا: لا والله ما اقصد شي بالعكس التونة لذيذة <-- بدا يخنبق

( يخنبق يعني يضيع علومه )

السيكيورتي: اندزلع انت ووجهك لم التفتيش

رحت لم التفتيش

لقيت العالم يمشون بسرعة


جا دوري ومديت جوازي

يوم شافوا الجواز الاخضر

عطوني هذي النظرة ----->

قلت وش فيه

قالت افتح كل شناطك وصفهن قدامي

انا:


هي: يالله بسرعة ورانا عالم

التفت وراي ما لقيت احد

طالعتها وقالت: اجل شكلنا بننبسط على تفتيش شنطك

صفيت الشنط على الطاولة

وطبعاً طلعت البلاوي

أول شنطة كانت اتكيت كلها بدل و عطور وتيشيرتات واشياء حركات يعني

طبعا بعد ما حاستها حوس راحت للثانية

وانا قلبي بدا يطق طق مهوب صاحي كنك داخل قاعة فيها طقاقات

الشنطه هذي كان فيها اوراق و التونة وثوب و شماغ وبعض الهدايا التذكارية من اختي الصغيرة وهي عبارة عن بعض الالعاب المكسرة و بعض الاوراق اللي نص اللي فيها ما اعرف اقراه<----- يا حبيلها بس

كل هذا تقدرون تقولون انه ينهظم لكن الادهى والامر ما بعد شافته

طبعا يكون في معلومكم انا نفسي ما ادري عنه

قعدت تلف وتحوس بين ها الملابس

وفجأة
اعلاااااان


طبعاً زي ما انتم متعودين في الأجزاء السابقة كان فيه دعايات

لكن ها المره الراعي الرسمي سحب عليّ وتركني لوحدي في مهب الريح

لذا انا سويت دعاية من نفسي


كاكاو ينشب في السنون

لا تاكلونه وبعدين يجيكم سوس


بااك

وفجأة وفجأة

وهي قاعده تحوس في الشنطه الاخيره

لقت كيسة بهارات صغيرة و موزيه داخل وحده من المخابي

انا يوم شفتها طلعت عيوني

وهي يوم شافتني قالت في نفسها اكيد هذي مخدرات وموزيها ويوم لقيتها تفاجأ

قالت لي : ما ادري وش اقول لك يا مستر ابو شوشه

بصراحه من سمعنا خبرك في مطار الرياض وحنا قايلين ان وراك شي

انا

طبعاً خلال 5 ثواني ويجون الثلاث سيكيورتيه اللي كانوا يلاحقوني

ويمسكوني ويدخلوني غرفة الحجز

ومن تتوقعون لقيت هناك ؟؟؟

المتوهق <------ هذا لقب ابو الشباب اللي ساعدته

سألته وش عندك:

قعد يخرط عليّ والزبده ما فهمت شي منه

بعد اعادة الكلام فهمت انهم لقوا معه بهارات مثلي

طبعاً اغلب السعوديين يحملوون معهم قدور و بهارات وبعضهم جايب معه خيش رز

بعد ساعتين في الحجز طلعونا بشهادة الطباخ حق مطعم المطار ان اللي معنا بهارات

وانا طالع طلب توقيعي

طلعت من مبنى المطار وكانت درجة الحراره 6

يوم شفت الجو كذا لبست الجكيتات اللي عندي

طلعت مره ثانيه واشوف العالم يناظروني ويقولون وش فيه ذا لابس جكيت في عز الحر

<------ هذا حر عندهم

وآخذ اقرب تكسي وعلى الفندق اللي اكتشفت ان حجزي عندهم مكنسل <--- لا تسألوني ليش لاني للحين ما اعرف

المهم حجزت من جديد ورقيت للغرفة وسحبتها نوووومه لمدة 14 ساعة

والحمد لله رب العالمين

انتهت القصة


أحب اشكر جميع الأعضاء اللي تابعوا القصة وشجعوني وحمسوني

الف الف شكر لكم جميعاً

وان شاء الله نشوفكم في قصة جديدة ونصبه جديده