تعدد الزوجات

[صقور الارض]

مساء الخير ام ابراهيم ..


انا ماراح اكتب مثل الاخت رسالة انا راح اكتب لك شئ فى الصميم ومن الواقع وباسلوب الشباب عشان تعرفين ايش يفكرون فيه...

اول شئ انا مو متزوج عشان مايقول واحد انت عايش حياتك غلط ومدري ايش وواحد يقول وش عرفك عشان تنصح ومن هالكلام الى ماهو جايب همه انا عاشرت شباب كثير وسمعت منهم قصص واجد عن الرغبة فى الزواج من ثانية ...

ابي اعطيك بعض الامور الي الشاب يبيها من زوجته لكن خلينا نتكلم عن عيوب الزوجة السعودية اولا واعذرني على الكلام الي ممكن يكون قاسي بس هذا واقع اكثر بناتنا ومن اراء ازواجهن


السعودية ماتعرف تنافس على زوجها ابدا يعني بمجرد مايملك عليها خلاص وهي تبيه حطت فى بطنها بطيخة باردة ونامت .. طيب يابنت الناس الرجل يبي منك اهتمام من نوع ثاني بس انت افهمي شخصيته قبل !!!

بعض الشباب

من النوع الثقيل الي يعجبه المرأة المنتزنة العاقلة !!! خلاص صيري عاقلة ومتزنة معاه وعامليه كانه امير او ملك بصراحة عشان تكسبينه عشان لما يفكر يتزوج ثانية يقول وين القى وحدة مثل هذة باحترامها لي ويقعد يقارن حتى تتطير الفكرة من راسه ...


بعض الشباب من النوع راعي وناسة يحب الفرفشة الضحك النكته دمه خفيف راعي طلعات وكشتات ( مثلي)

اذا اخذ له وحدة ثقيلة دم وشلون يعيش معها يعني رما عليها كلمة تضحك او نكته او مقلب خفيف وزعلت الخبلة هذة وش راح يكون ردة فعله هو !!!!!!!راح يحرم يمزح معها مرة ثانية ومن هنا يبدا يفكر بغيرها لانه نفسه حلوة ومرحة مايقدر يتحمل ثقل الدم ابد يقو ل في نفسه ياعمي اناعايش مع وحدة معقدة ماتعرف الابتسامة وش الله حادني عليها ..... وهذا سبب قوي بعد ..

لا خليكي راعية وناسة وضحك حتى حياتك تصير لها طعم ...


بعض الشباب راعي نظافة واتكيت واناقة يبي وحدة زيه تهتم بالشئ هذا يعني هي راح تعرف الحاجة هذة من خلال تعاملها معه مو تطبق مبدأ والله هذا حياتي وانا متعودة على كذا وما عندي استعداد اتغير عشانك !!!!

كذا راح يسحب عليها من اول مشكلة تصير يقول الفكة منها راحة ياعمي هذة وحدة مقرفة وماهي نظيفة وماعندها اناقة ولارقي ويبدأ يفكر بالزواج عليها او ممكن يطلقها اذا ماعندهم اولاد ...

وفيه نوع عنده فراغ عاطفي يبي يعوضه بالحلال ويلقى قدامه وحدة كنها جدار اوخزانة لامشاعر لا احساس وفوق كذا يشوف المشاعر هذى تمارسها قدامه مع خوياتها ومسجات شوق ومحبة .... طيب هالا دمي الي ضافك فى بيته ماله تقدير عندك !!!!...
وممكن يشوف افلام ومسلسلات عن الحب ويتأثر ويدور على النشوة هذة مع زوجته بس للاسف ما يحصلها وهي لم تكتشف انه يكلم بنات من وراها تقوم الدنيا وتقعدها وتقول ( وش قصرت فيه معه عملت له وعملت له ) طيب وينك عن مشاعره !!!!

وبعضهن تكشخ آخر كشخة للافراح والمناسبات والزوج يشوفها بس اذا ودها للحفلة واذا رجعها فقط واول ماترجع له البيت ترجع تلبس روبها المعفن ابو ريحة وتنكش شعرها وتجلس قدامه بكشتها

طيب الرجال من اليوم وهو على القنوات الفضائية ويشوف الشقر والسمر والدلع (الكلام هذا ماينطبق على المطاوعة والناس الملتزمة الله يبثتهم على الحق ) ويرجع للبيت يحصل هذة تستناه كنها واحد من اخوياه بس بدون شنب
وش راح يكو ن شعوره ..... راح يتمنى انه ماتزوج وصار عزوبي احس له ..


وفيه نوع يحب الهدوء ماراح يتحمل الحرمة المزعجة فى البيت

وفيه نوع يحب ماحد يلمس اغراضه

وفيه نوع عنده اهم شئ مجلس الرجال والقهوة مايحب الحرمة الباردة فى التقديم وغيره ..


يعني بالمختصر لازم تعرف ايش نوع زوجها عشان تتبرمج معها وتصير زي مايبي ماهو زي تبي هى والا لا زم تتحمل الي يجيها من طلاق او ضرة ...

لازم يكون ترتيب الزوج الاول عندها بالاسرة وبعدين الاطفال وبعدين اهلها ... هذا الترتيب الصحيح لكن اذا كان هو المرتبة الاخيرة يعني اطفالها واهلها وبعدين هو لا والله ابشري بالمرأة الثانية على راسك ...


وفيه بنات رجال مستورات وماهن مقصرات بشئ على ازواجهن بس ازواجهن عيونهم فارغة ومايرضيهم شئ واحيانا يكون الرجل لئيم من الرجال مهما عاملته بالحسنى يردها بالاساءة ...

هذا النوع حرام يتزوج ويتولى على مسلمة المفروض يبقى عزوبي لين يقطن ينقطع نسله حتى مايجي عياله مثله وتمتلى الدنيا انذال اكثر ماهي مليانة ...


الحديث يطول ويطول مرة لان الموضوع مشربك ومعقد وخليت الكلام انا باللغة العامية عشان بعض المصطلحات الى دخلت بالموضوع ويكون اقرب للجلسة من لموضوع فى منتدى ....

انا فى منتدى الرياضة دايم بس مدري وش لقفني ادخل على مواضيع المتزوجين بس اللقافة وش تقول فيها ...


تحياتي للجميع ...