لاتغرك الدنيا تراك انت رحّــــــال

------------------------------------
نصيحة

الطيب والخوه وجزلات الأفـــعال **** عسرات للي يبتغون العـلالي

ما كل منزل للرجاجــيل مـــدهال **** ولا كل مــدهل فـــيه تلقى رجــالي

ولا كل من تنخاه للحمل شـــيّال **** ولا كل فــزّاع فــزع لك ياغالي

أفعالنا وطباعنا وبعض الأقـــوال **** تغيرت وما عاد فــــــينا وصــالي

قام الـــردا يندس فـــينا ويخـــتال **** بان الردا والبعض فيه اخــــتلالي

خذها نصيحه والزمن فيك لو طـــال **** يجيك يوم ويذكرونك أجــــيالي

خذها نصيحه يمكن بيـــوم تنـــقال **** نصيحة العـــقّال يوم المقــــالي

خذها من مجرب وصل عالي الجال **** ويوم ارتفع حدّر من أعلى الأعالي

خــــويك المخلص على كل الأحوال **** لا تامنه واحذر مطاح الحـــبالي

اللي رفيقه يرفع الراس ما مــال **** ينهى رفيقه عند دروب الخلي

واللي رفيقه خايبٍ خاب وان طــال **** حبل الرفاقه بينهم باحـــتمالي

تلقى من الأشخاص طيّـــب ومازال **** متمسك بعــاداتهم بارتجـــالي

متمسك بعادات ويضرب لها أمـثال **** عادات كانت في زمان مـــضى لي

عادات كان الناس حلوين وقــلال **** تجمعهم البسمه لو الجــيب خـــالي

واليوم انت الشيخ من بعد الأمــوال **** وانت السفيه إن قــّل مــالك وزالي

لاتغرك الدنيا تراك انت رحّــال **** ولاتغرك الفتنه وبعض الــَدلالي

وابسط يمينك يم خَـــير ورجّــال **** وامسك يمينك عن ردي العـــيالي